اليوم في طريقي للجامعة شفت ستوري في instagram لصبية حاطّة صورة لميناء حيفا من الجامعة وكاتبة عن شعور الوطن والانتماء ومرسى القلب وهاد الكلام. في حالة من هالنوع بتصيبني حاجة ملحّة بقول إنّه الي جرّب حيفا بس من فوق، بس من الجامعة، بعرفهاش. بس في شيء منعني من الاستمرار في هذا الخط من التفكير، بلاش يا عُلا، خلي كل حدا يعيش المدينة بالطريقة الي بتناسبه، مش لازم نفرض تجاربنا ع رؤية الآخرين للأمور.

------

في فرق بين الوحدة كاختيار، نتيجة منوصلها بعد تجارب متقرحة - أقل المسالك ألمًا، والوحدة المفروضة عليك. ومرات فرض الشيء بكون حاجز أمام الاعتياد لأنّه النفس سهل تخدعها الظروف وتطوّعها طالما بتشعر إنّها هي المتحكمة بمصيرها مش في شيء بجبرها تمشي نحوه.